Kevin, viaxe a BCN e día 1

Nesta viaxe de fin de curso decidimos ir ata Calafell, en Tarragona. A saída dende Salceda foi as 10 da noite, eu cheguei sobre as 10:05 e, ao chegar, encontreime con que todos os alumnos xa estaban dentro do autobús e estaban esperando por min, que era o último en chegar. Non pensei que foran ser todos tan puntuais...

DÍA 1

A viaxe en autobús foi horrible, non sei que era peor, se a calor que facía na parte traseira producida polo motor ou o cheiro a humanidade que aromatizaba o corredor ata chegar o nariz impedíndome respirar.  Despois de tres paradas e unha viaxe eterna case sen durmir, chegamos por fin o pobo de Calafell, un pobo cheo de vellos xubilados. Calafell e fantástico, xa que a uns 100 metros da urbanización atópase a praia de Calafell, que é unha praia bastante grande rodeada de tendas.

Unha vez alí, camiñamos coa pesada maleta e instalámonos no Hotel Miramar, un hotel cheo de vellos giris buscando onde gastar a súa pensión. Despois dun pequeno descanso, os profesores mandáronos facer unha quedada no vestíbulo, onde había uns cómodos sofás, para ir xantar todos xuntos no buffet do hotel. O buffet gustoulle a pouca xente, aínda que na miña opinión e gusto, comíase ben, xa que case sempre había pizza, pasta con salsa de tomate, patacas fritidas, etc. Aproveiteino e me puxen as botas, o que fixo que engordara 4 Kg nesta excursión.

Máis tarde viaxamos a Vilanova i la Geltrú, onde nos esperaban divertidas actividades nunha gincana que duraba unha hora, 30 minutos montando en segway, e outros 30 nun obradoiro mariñeiro. Por último fixemos a viaxe de volta cara ó hotel, ao chegar ceamos e durmimos pronto, xa que estabamos todos moi cansos.

5º dia en Barcelona City (Brasil)

Xa estabamos no quinto e penúltimo día da excursión, e realmente o tempo pasaba voando. O importante era que nolo estabamos pasando xenial, e este xoves prometía moito porque estaría cheo de actividades.

Como cada día, seguimos o mesmo ritual de espertar cedo, almorzar, coller a caixa do pícnic e subir ao bus, que nos levaría a Vilanova i la Geltrú. Unha praia moi grande e cun clima incrible.

Desta vez para realizar actividades marítimas, como Vela e Kayak. Estabamos moi excitados porque era unha experiencia que moi poucos tiñan vivido. A verdade é que a maioría non tiña experiencia, pero foi moi divertido e emocionante.

Dividíronnos en dous grupos, e antes de comezar, os monitores nos deron unha pequena clase básica. Cada grupo ocupou unha hora de actividade e pasámolo moi ben.

Chegou a hora de coller o pícnic e ir comer a un parque situado a uns poucos metros da praia. Despois de relaxarnos un pouco e aproveitar para durmir, volvemos á praia para xogar ao "voley" e ao fútbol praia.

Dividímonos en 4 equipos, dous para xogar ao fútbol e os outros dous ao voley.

Xa eran as 7 cando marchamos para o bus e volvemos ao hotel, estabamos cansos despois de tanto esforzo. Chegamos ao hotel sobre as 8 e logo fomos cear. Pero antes preparamos as maletas, porque cada vez quedaba menos para ir a Portaventura. Despois quedamos en ir á discoteca "Nicky´s" xa que era a última noite e había que dalo todo!

Aproveitamos ao máximo esta derradeira noite e, como era de esperar, volvemos ao hotel tarde, dispostos a descansar para o día seguinte ir a PORTAVENTURA!

NOTA: As comiñas se poñen con shift + a tecla do número 2, non cos acentos graves e agudos.

Chicas USA, día 5 en Barcelona ♥

Molt bones de nou!

Xa estamos de volta con unha nova entrada, en esta ímosvos contar o noso quinto día, que para non variar éche moi movidiño. Imos alá! 

Día 5, xoves 10 de abril.

Esta mañá tardamos bastante en espertarnos xa que a noite anterior saíramos. A verdade é que todo o mundo chegou tarde ao almorzo por quedarse durmido. Cando chegaron todos pasamos ao comedor onde almorzamos e comemos ata fartarnos xa que de tanta troula tiñamos fame.
Despois do almorzo déronnos un rato para prepararnos xa que íamos pasar todo o día na praia.

Andrea e Mar tras terminar o
paseo en vela e kayak

O noso plan de hoxe era do máis activo. Pasamos o día n praia de Vilanova i La Geltrú onde, pola mañá, fixemos vela, kaiak, e, pola tarde, fútbol e voleibol. Dende o noso hotel, Ramblas Miramar, ata a praia de Vilanova i La Geltrú había uns corenta minutos de viaxe, e como de costume Sergio e Lois seguían deleitándonos coas súas fermosísimas voces.
Ao chegar os monitores dirixíronnos ata un sitio onde gardaban os traxes de neopreno e alí puidemos cambiarnos e polos. Unha vez vestidos fomos ata a praia e dividímonos en dous grupos, un para facer kaiak e outra para facer vela.

A nosa queridísima caixiña de pic-nic

A min e a Laura tocounos primeiro ir en kaiak.  Tivemos que pornos por parellas para que nos fora máis fácil movernos pola auga. Antes de poder subirnos neles, os monitores explicáronnos como debiamos facer para movernos máis rápido e sen facernos dano. A verdade é que non parecía moi difícil pero resultounos un pouco complicado ao principio, aínda que despois foinos bastante fácil.
Andrea, como estaba noutro grupo, fixo primeiro vela e logo kaiak. A Laura tocoulle ir de parella con  Ainhoa e a min tocoume con Rodrigo. A verdade e que ir en kaiak cansa bastante xa que non paras de remar. Estivemos  uns corenta minutos aínda que paramos un chisco. 
Despois de que xa pasara unha hora tivemos que cambiar á vela. A Andrea, na primeira quenda de vela, tocoulle con Marisé, María, Mar, Isa e Nerea, e a min tocoume con Laura, Ainhoa, Tamara, Héctor, Lara e Blanca na segunda quenda. Despois de vinte minutos navegando, preguntámoslle ao monitor se nos podiamos tirar a auga porque ía algo de calor e xa que estabamos alí había que aproveitar. O monitor díxonos que estábamos un pouco tolos porque a auga estaba bastante fría aínda que a nós non nos importou e tirámosnos de todas formas. 
Gustounos moito ás tres ir en vela,  xa que era moi relaxante e non tíñamos que facer gran cousa, e como ben sabedes somos moi vagas. Pasada unha hora volvemos á praia.
Unha vez reunidos volvéronnos levar a onde nos cambiáramos anteriormente para que puidésemos quitar o traxe e darnos unha ducha.

De troula no Nicky's!

Nada máis terminar dirixímosnos ao autobús para coller as nosas caixas de pícnic e ir ata o parque que se encontraba ao lado da praia. No noso pícnic había dous sándwichs, unha botella de auga, chocolate, un batido, algunha peza de froita e pouco máis. A verdade é que se estaba moi ben tirados no chan, á sombra e comendo e ata aproveitamos para botarnos unha sestiña.  
Chegadas as catro fomos ata praia. Volvéronnos a dividir en dous grupos, un para xogar ao fútbol e outro para xogar ao voleibol e logo cambiar. Como xa sabedes, Andrea tiña mal a man e polo tanto só puido xogar ao fútbol (mentres xogaban o volei, os profes convidáronna a tomar algo con eles). Foi unha tarde do máis divertida xogando e pasándoo ben todos xuntos. 

Laura e Sebi en na discoteca Nicky's

Cando xa se facía de noite, os profesores dixéronnos que nos tíñamos que ir para que nos dera tempo a chegar ao hotel e cear. Tardamos corenta minutos en chegar o hotel e a maioría estabamos durmidos, aínda que como debedes de supor, Sergio e Lois non paraban nunca de cantar!
Nada máis chegar ao hotel déronnos apenas dez minutos para subir ás habitacións e baixar a cear. No comedor, como todas as noites, estaban os anciáns aos que sempre lles puñan música e non paraban de rir e bailar. De feito, Lois chegou a bailar cunha muller que a pesar de ter os seus anos era moi divertida e movíase moi ben. 

Ao contrario dos outros días puidemos saír por aí de troula. A noite comezou no "Nicky's" onde nos atopamos rapaces e rapazas da nosa idade e de máis, de distintos sitios cos cales fartámonos de bailar. O dono da discoteca, que a verdade estaba un  pouco mal da cabeza, era máis ca divertido e tamén bailou moito con nós. Iso si, de vez en cando íamos ao "On Sempre" que era xa como noso, ademais levabámosnos tamén moi ben co dono, Toni.
Non sei moi ben a que hora chegamos ao hotel, iso si, todos estabamos moi felices. Foi unha noite inesquecible e divertida que lembraremos sempre.

Bueno xente, ata aquí a nosa entrada, espero que vos gustase e que queirades ver como acaba esta excursión tan divertida. Adeu :)

BCN! Abraham - Día 6 e 7

O xoves 10 de abril volvemos a Vilanova i la Geltrú para continuar co que deixamos pendente o domingo 6.

Pola mañá, fixemos kaiak, en parellas, e vela, en grupo.

Sendo ensinados polos monitores a como remar

A miña parella no primeiro deporte foi Christian, co que tamén compartín habitación, como dixen entradas atrás, e o cal tamén estaba no meu grupo de vela.

Christian e eu na ribeira do mar aprendendo a navegar

En kaiak fomos remando dende unha praia de Vilanova i la Geltrú ata outra atravesando o mar. Para facervos unha idea, fixemos o equivalente dende unha punta da praia de Samil de Vigo ata a outra, aproximadamente.

Remando sen pausa pero sen présa

Ademais, rematamos bastante cansos, sobre todo na parte dos brazos, pero recuperamos forzas comendo de pícnic nun espazo verde próximo, sentados en toallas.

Almorzando relaxadiños e tomando o sol

Pola tarde practicamos fútbol e volei praia en grupos. Dende o meu punto de vista, esta actividade podería terse suprimido. Poderiamos ter ido a Sitges no seu lugar!

O venres 11 de abril era o noso último día. Había que aproveitalo ao máximo! E que mellor despedida que ir ao Parque de Atraccións PortAventura durante todo o día.

Cartel de benvida de PortAventura

Ás 10:00 xa estabamos alí, pero non puidemos entrar ata as 12:00. A razón de tan longa cola foi que a todos os institutos que estaban de viaxe, como o noso, se lles ocorreu a brillante idea de ir a PortAventura ese día, que por certo era o inaugural do 2014.

Todas as persoas que esperaban para entrar no recinto

Alí, obviamente, montamos en atraccións (eu subín a un par de montañas rusas, a un simulador acuático, aos rápidos, ás cuncas tolas, etc.), vimos espectáculos (eu puiden ver un sobre paxaros e un musical) e compramos recordos.

Unha montaña rusa de PortAventura na que NON montei

Como anécdota, direi que á hora de comer fomos a un buffette dentro do recinto onde me caeron todos os macarróns do prato. Isto de ser torpe vén de familia.

E ás 19:00 arrancamos cara Salceda tras unha semana chea de novidades e emocións, que non me importaría volver realizar.

Ata sempre, Barcelona!

BCN! Abraham - Día 1 e 2

Ola!

Son Abraham, do grupo de Xapón, e nas próximas entradas relatareivos a miña viaxe real a Barcelona. Comecemos!

O sábado 5 de abril estabamos todos moi nerviosos, tanto profesores como alumnos, pola inminente viaxe. Eramos uns corenta adolescentes con ganas de pasalo ben e afastarnos un tempo das clases e, por fin, ás 22:00 da noite, saímos de Salceda de Caselas para chegar ás 12:00 do día seguinte a Calafell.

Todos moi cansos á chegada a Calafell

O autobús non era moi espazoso, de feito chegamos a pensar que os asentos da parte traseira estaban máis xuntos que os da parte dianteira. Aínda así, non houbo moitos problemas de espazo debido a que algunhas persoas, me inclúo, deitámonos no corredor do bus para durmir.

Como é de supoñer, pasamos a noite en ruta, aínda que a viaxe se fixo levadeira porque houbo bastantes paradas en áreas de servizo e, ademais, tiñamos DJ propio que "amenizaba" o ambiente: Sergio, do grupo de Mónaco.

O domingo 6 de abril, dende que chegamos a Calafell e durante toda a mañá, nos aloxamos no Hotel Ramblas Miramar, e puidemos comprobar que compartiriamos estanza con anciáns moi simpáticos de todas as nacionalidades. Eu, persoalmente, compartín cuarto con Christian, do grupo de Australia, e Brais, do grupo de Brasil.

Detalle en todas as habitacións do hotel

Despois de xantar, a miña prima Andrea, do grupo de EE.UU., e máis eu, fomos dar unha volta polo paseo marítimo que estaba a un minuto do hotel. Primeira liña de praia!

A espectacular praia que estaba ao lado do hotel onde nos aloxabamos

Detalle no paseo marítimo

Pola tarde, fixemos actividades deportivas en Vilanova i la Geltrú moi variadas. Tivemos a oportunidade de facer unha xincana na praia, a cal englobaba retos como carreiras en kaiak e de sacos.

Os monitores explicándonos as actividades organizadas para ese día

Ademais, fixemos un circuíto en segway, un, atención, vehículo de transporte lixeiro xiroscópico eléctrico de dúas rodas con auto balanceo controlado por ordenador, o cal nun principio nos asustou un pouco, pero máis tarde nos desenvolviamos nel con total seguridade.

Noel Lee en segway saludando a Lady Gaga © mt3forum.net

Por último, tivemos un taller mariñeiro no que nos explicaron como preparar un barco de vela para ser botado, o cal nos serviu como preparatorio para o xoves 10, día no que iriamos a navegar.

Todos posando na praia despois da fantástica, aínda que cansa, xornada

Ata a seguinte entrada!

Día 0 e 1 en BCN versión chicas USA

Molt bones de nou! (Moi boas de novo!)

Xa estamos de volta as moza de USA para contarvos todo sobre a nosa excursión de fin de curso a Barcelona para a que estivemos varios meses traballando. Unha nova aventura!

Nesta entrada deixamos atrás a nosa viaxe imaxinaria para dar paso a unha que vivimos hai pouco xunto ós demáis compañeiros de 4º do instituto.

Nunha parada que fixemos
durante o traxecto.

Día 0 e 1, sábado 5 e domingo 6 de abril. 

O sábado ás once da noite cargamos a pesada equipaxe no autobús, que nos esperaba na porta do instituto, e comezamos a nosa viaxe de catorce horas con destino Barcelona. 

Tras unha longa viaxe nun autobús repleto de adolescentes alterados e de Sergio máis Lois cantando todo o rato, chegamos por fin ó noso desexado destino, Calafell, un pequeno municipio costeiro de Tarragona, onde se atopaba o noso hotel a pé de praia. Estabamos aloxados no Hotel Ramblas Miramar, na primeira planta. Moi cansas instalámonos nas nosas habitacións e nos deron un rato de descanso ata a hora de comer.  Nesta ocasión non estabamos as tres xuntas xa que Laura decidiu abandonarnos por Ainhoa e Tamara (na 137) mentres que Iria máis Andrea quedaron noutra habitación (na 135).

Habitación de Iria e Andrea 
e vistas dende esta.

Sobre as dúas do mediodía baixamos ó comedor do hotel a xantar. Era tipo bufet polo que cada un collía o que quería. Ao rematar, Chefa, Suso máis Juan Carlos (Curi) déronos un rato de tempo libre por Calafell. Demos un paseo pola beira da praia xa que facía un día moi bo e ataaproveitamos para meter o pés na auga. A verdade é que estaba un pouco fría pero unha vez que te acostumabas facíase agradábel notar ese fresquiño nos pés.Sobre as catro da tarde preparamos as cousas da praia xa que íamos pasar o resto do día nunha praia de Vilanova i la Geltrú. A viaxe en autobús levounos uns corenta minutos e ó chegar separáronnos en tres grupos.

No aprendizaxe a vela.

Un tiña unha hora de xincana (tiñan organizadas carreiras de obstáculos ekaiak). Outro estaba unha media hora na iniciacións nos segways e ó que quedaba tocáballe a iniciación á vela. Íamos rotando nas tres estacións. Ata lle deron medallas a Brais máis a Jose por facer o mellor tempo na carreira!

Rematadas as actividades, sobre as oito da tarde, marchamos da praia para volver ó hotel. Alí nos duchamos e sobre as nove da noite baixamos a unha sala próxima para cear (ó comedor polas noites estaba ocupado por un grupo de anciáns que facían xornada de baile). 

Zona onde se encontraba o 
hotel Ramblas Miramar.

Tras a cea, os profes obrigáronos a andar polo paseo da praia para non ir durmir co bandullo cheo. Estábamos tan cansos que os ánimos eran como dun funeral. Andamos sobre media hora e ó chegar as nosas habitacións caemos rendidas na cama.

Ata aquí a chegada e o primeiro día por terras catalás. Estade atentos as nosas seguintes entradas porque prometen! Adeu :)